Сегодня и вчера

Лицевой летописный свод Ивана Грозного. Русь (1122 - 1181 гг. от. В.Х.) Факсимильное издание. — М., 2014. — С. 674.

В лето 6665 [1157]. Князь велики Черниговскии Изяслав Давыдовичь начя совокупляти рать на великого князя Киевскаго Юрьа Долгорукаго Владимерича Маномаша, и с ним князь велики Смоленскии Ростислав Мстиславичь; Князь велики же Юрьи Долгорукии слышав, розосла гонцы, по всем своем великом княжении собирая воинство, и помале впаде в болезнь; пив бо Юрьи у осмьника у Петрила маиа в 10, и в ту нощь разболеся, и бысть болести его 5 днии, в неи же и преставися месяца маиа в 15 день, в среду на ночь, княжив лет 33. Сынове его: Ростислав, Андреи Боголюбскии, Иван, Борис, Глеб, Мстислав, Василко, Ярослав, Михалко, Святослав, Всеволод. А в четверток положиша его в монастыре у святаго Спаса на Берестове. И много зла сотворися в тои день: разграбиша двор его Красныи и другыи двор его за Днепром разграбиша, его же звахут Самораем, и Василков двор сына его в городе разграбиша; и избивахут суздалцев по городом и по селом, а имение их грабяху. Князь великии же Изяслав Давыдович Черниговскии пришед в Киев, вся имениа его взят, и дружину его поима, овех оковы железными связа, а других в темницы всади, и сяде на столе на великом княжении в Киеве, месяца маиа в 18 день, а сыновцы его с ним, А князя Святослава Владимеричя остави в Чернигове. И приидоша на него князь Святослав Олговичь и князь Святослав Всеволодич, он же отбися от них; они же шедше, сташа за Свиною. И слышав сиа, князь велики Киевскии Изяслав Давыдовичь иде к нему в помощь из Киева со князем Мстиславом Изяславичем, и сташа противу им, и смиришася, и даша стол великого княжения Черниговскаго князю Святославу Олговичю, а Новгород Северскии князю Святославу Всеволодичю, и тако смирившеся и в любви бывше, разыдоша ся кождо во своя си, а князь велики Изяслав Давыдович возвратися в Киев. Новогородцы же слышавше преставление великого князя Киевскаго Юрья Долгорукаго Владимеричя Маномаша, и яко по нем сяде на великом княжении в Киеве князь велики Черниговскии Изяслав Давыдовичь, и начаша высылати из Новаграда князя своего Мстислава Юрьева сына Долгорукаго. Таже послаша множество воинства вооруженых на него, да вскоре изыдет из града; «послахом бо, глаголюще, по князя Святослава Ростиславичя и по брата его по князя Давыда Ростиславича, и тогда ти будеть всячески неугодно». И тако в тои час мост переметаша на Волхове, и полцы мнози вооружены сташа, а друзии на оном полу, и вмале не бысть сечя зла; Приидоша бо в тои день князь Святослав Ростиславичь, брат его князь Давыд Ростиславичь. И слышав князь Мстислав Юрьев сын Долгорукаго, и побеже тои нощи из Новагорода в Ростов, к болшему брату своему князю Андрею Боголюбскому. В третии же день прииде в Новъгород и сам князь велики Смоленьскии Ростислав Мстиславичь, внук Владимера Маномаха, и снидошася братиа, и не бысть зла ни чтоже, но смирение много промежи их бысть и любовь велиа, И посади на великом княжении в Новегороде сына своего князя Святослава, а в Новом Торгу посади сына своего князя Давыда, а сам возвратися в Смоленеск.