Летопись:

В лето 7002-ое погоре Рязань вся. Того же лета прииде из Волох Иоанн Андреевичь Субота Плещеев, а из Крыму Костянтин Заболоцкой, а шли Полем и грабили их на Поле татарове. Тое же осени, ноября в 6 день, преставися князь Андрей Васильевичь, а сидел в тюрме на Москве, на Казенном дворе, два году и 47 дний. И положиша иво у Архангиле на Москве, у северских дверей. Того же лета, в 10 день ноября, в неделю, вшел князь велики в новой двор жити во граде на Москве, а стоял после пожару у Николы у Подкопаева на хрестьяньских дворех. Того же лета, в 16 день, отпустил князь велики крымского посла, да с ним вместе послал князь велики в Крым к царю Мингирею своего посла Костяньтина Малечкина. Тое же зимы, генваря в 17 день, приидоша на Москву литовские послы к великому князю Ивану Василиевичю от великого князя Александра Литовскаго о миру и о сватовьстве, пан Петр Яновичь, да пан Станислав Яновичь, да Воико Клочко, да Федко писарь. И князь велики Иван Василиевичь всея Руси взят мир вечной и докончание с зятем своим, с великим князем Александром Литовским, братьство и любовь, да и дщерь свою княжну Елену обручал за великого князя Александра Литовского. Тое же весны, марта в 9 день, послал князь велики послов своих в Литву к зятю своему, великому князю Александру Литовскому, князя Василья Косово княжь Иванова сына Юрьевича, да князя Семена Ивановича Ряполовьского, да дияка Феодора Курицына свершити сватовство миру и привесьти к целованию князя великого Александра Литовского на докончальных грамотах. Они же, шедше, сотвориша тако и оттоле возвратишася и приидоша на Москву маия в 25 день, в неделю. Тое же весны, маия 17-го, митрополит Зосима остави митрополию не по своей воли, и соиде с митрополии в келию на Симоново в монастырь. Того же лета, маия, преставися князь Борис Васильевичь Волоцкой, и привезоша его на Москву и положиша в церкви архангила Михаила. Того же лета отпустил князь велики Иван дщерь свою Елену за великого князя Литовьского за Александра Андреевича, а приходиша по нее князь Александр Лшаньской, да пан Ян Забережский, да Юрьи Зиновьевич, а своих послов князь велики послал и з женами: князя Семена Ивановича Ряполовьского, да Михайла Яковлича Русалку, да дьяка Василья Кулешина и иные многие дети боярьские двора великого князя, и проводивь ю, возвратися на Москву. Того же лета приидоша послы великого князя на Москву, Мануило Ангелов Грек да Данило Мамырев, что посылал их князь велики в Веницею и в Вадиалам. Того же лета приидоша послы [слы написано над строкой.] к великому князю на Москву из Немец, от датского короля Ивана, именем Давид.